2 bata nakuryente sa perya

CEBU, Philippines - Kritikal sulod sa pribadong tambalanan ang kapin usa ka tuig nga batang lalaki human nakuryentihan uban sa 13- anyos nga ig-agaw sa miaging adlaw pasado alas-10 sa buntag diha sa usa ka peryahan sa J. Labra St,. sa barangay Guadalupe, siyudad sa Sugbu. Ang mga biktima giila sa kapulisan nga mao sila si Wenright Tabasa Llanto, 13, residente sa nahisgutang lugar, ug ang kapin usa ka tuig nga batang lalaki nga si Sam Louise Tabasa Llanto. Sa pasiunang imbestigasyon ni PO3 Ruth Violango ug mga kaubanan sa Homicide Section nagbutyag nga si Wenright nagsabak kang Sam Louise duol sa usa sa mga sakyanan sa peryahan sa dihang kalit nakuryentihan dihang nahikapan ang rehas nga puthaw.

Matud pa nga nangatumba ang duha diha sa maong peryahan ug ang mga tawo na maoy mitabang kanila pagdala sa Vicente Sotto Memorial Medical Center aron mapatambalan apan wala magdugay gibalhin lang sab dayon ang mga biktima sa Cebu Doctors Hospital.

Segun sa report sa kapolisan si Wenright gidala sa surgical ward samtang si Sam Louise anaa sa Intensive Care Unit (ICU) tungod sa mga paso nga naangkon sa iyang kalawasan. Dugang report si Mark Tabasa amahan sa kapin usa ka tuig nga bata gikatahong makigkita sa tag-iya sa maong peryahan nga ginganlan og Emmanuel Villordon kagahapon sa alas- 2 sa hapon diha sa barangay hall sa Guadalupe. (BANAT)