Sakop sa gang nakuhaa'g armas sa A-SHOT

CEBU, Philippines - Nadakpan sa mga sakop sa Anti-Street Hoodlums Operating Team (A-SHOT) sa Theft and Robbery Section (TRS) sa Cebu City Police Office (CCPO) ang usa ka 20- anyos nga lalaki nga giingong sakop sa Crips gang tungod sa paghupot og armas kagahapon sa tungang gabii diha sa dalan V. Rama Extension sa barangay Guadalupe, siyudad sa Sugbu. Ang nadakpan ug gibalhog sa detention cell sa CCPO mao si Orly Guasin Jacaban, ulitawo, nga taga sitio Lower Kalunasan, barangay Kalunasan. Si Jacaban nakuhaan og usa ka .22 magnum caliber rebolber nga dunay lima ka buhing bala sulod sa tambor niini.

Ang mga sakop sa A-SHOT pinangulohan ni SPO2 Maximo Lapa, PO2 Ruben Perater, PO2 Jefrey Bernal uban sa mga civilian volunteers nagpahigayon og police visibility patrol diha sa nahisgutang lugar.

Ilang nasigpatan ang grupo sa mga batan-on nga gituohang sakop sa gang ug sa dihang giduol usa kanila ang midagan paingon sa sudlonong bahin sa nahisgutang lugar hinungdan nga nahitabo ang ginukdanay. (BANAT)