Mayor sa Medellin limpyong konsensya sa kamatayon ni Abao

CEBU, Philippines - Gipaubos sa imbestigasyon sa kapulisan sa probinsya ang mayor sa lungsod sa Medellin tungod sa mga tabi-tabi nga migawas nga mao kini nakapusil sa team leader sa iyang Mayor’s Squad niadtong Lunes sa gabii diha sa merkado publiko sa nahisgutang lungsod.

Subay niini lakip sa giimbestigar mao ang hepe sa kapulisan sa lungsod nga si Insp. Bonifacio Arriesgado ug pipila niini ka mga sakop nga on-duty niadtong higayona tungod kay wala makaduso dayon og spot report sa provincial headquarters.

Apan si Arreisgado nga nahinabi sa Banat News mitug-an nga wala gyud sila makahibawo nga dunay napusilan niadtong Lunes sa merkado publiko kundili nakahibawo lang siya niana nang Martes sa gabii nga dunay napusilan ug nalandig sa Severo Verallo District Hospital sa lungsod sa Bogo ug namatay ang biktima. Sa nasayran namatay sa tambalanan si Edelberto Abao alyas Delvi, 57, taga barangay Lucha, Medellin kinsa nakaangkon og samad pinusilan sa tuo nga paa.

Si Abao maoy team leader sa Watchman nga sakop sa Mayor’s Squad ni Mayor Ricky Ramirez nga maoy gitahasan sa pagbantay sa mga establisamento diha sa lungsod sa Medellin.

Matud ni Arreisgado nga niadtong Lunes ang mayor uban sa laing tulo ka Watchman nga naglakip kang Allen Setenta nag-roving palibot sa lungsod sa Medellin nianang alas-11 sa gabii ug diha nila mahibaw-ing napusilan si Abao ug gipadala sa district hospital sa Bogo.

Apan sa mga tabi-tabi nga ang mayor maoy nakapusil kang Abao, si Arreisgado miingon dili tinuod ang maong tabi-tabi apan giapil niya sa pag imbestigar ang mayor. Si Sr. Supt. Erson Digal mipadala og imbestigador gikan sa Investigation and Detective Management Branch (IDMB) pinangulohan ni SPO1 Kenneth Abella apan giingong wala mokooperar ang hospital tungod sa wala paghatag sa impormasyon bahin kang Abao.

Sa gihimong follow-up sa Banat News sa Bogo police station nailhan ang doktor nga si Nestor Casas ug ang nurse on-duty nga si Mary Christine Tajo. Apan si Tajo nga nahinabi sa Banat News sa iyang cellphone kagahapon sa hapon mipasabot nga dili siya maoy nataymingan nga nag-duty niadtong higayona.

Si Tajo nagkanayon nga siya lang maoy nataymingan niadtong Martes sa gabii sa tulo ka mga pulis gikan sa provincial headquarters pasado alas-11 sa gabii nga bag-o pa siyang misulod sa trabaho maong gibalibaran niya sila tungod kay si Casas ray makahimo niini.

Si Mayor Ramirez sa gipadalang text message dinhi sa Banat News mipadayag sa iyang kaguol sa nahitabo ug miingon nga miatubang na siya sa imbestigasyon sugod pa kagahapon diha sa iyang balay.

“Limpyo akong konsensya. Delvi Abao was my personal bodyguard and di to siya mosugot nga dunay lain mobantay sa ako except siya ra. That’s why gitukoran nako siya’g balay tapad sa akong balay para makakuyog siya sa akoa anytime,” matud pang Ramirez. Sumala pa niini dihang midaog siya pagkamayor iyang gikuhang regular nga empleyado isip supervisor sa mga gwardiya sa munisipyo,eskuylahan ug merkado si Abao.

Dugang pa niya nga matag gabii duawon gyud niya sa pwesto si Abao ug sila mag-uban nga magpatrolya.

Samtang giangkon niya nga tungod sa iyang pagkapolitiko dili kalikayang butangan og malisya ang kamatayon sa iyang sakop ug ang nahitabo kang Abao susama ra og nawad-an siya og miyembro sa pamilya. (BANAT)