Opisyal sa kapolisan nanulong nakapusil og mag-uuma

CEBU, Philippines - Usa ka opisyal sa kapulisan ang gibalhog sa detention cell sa Cebu City Police Office (CCPO) human gilambigit sa pagpamusil sa usa ka mangulingay sa miaging alas-3 sa kahaponon sa bukirang dapit sa sitio Buwanan, barangay Pung-ol, Sibugay siyudad sa Sugbu.

Ang suspek giila sa Homicide Section sa CCPO nga si Insp. Samuel Romulo Burlas Panilagao, 49, taga 460 V. Rama Avenue, barangay Guadalupe ug nadestino sa 2nd Coy sa Regional Public Safety Battalion nga nakabase didto sa lungsod sa Moalboal.

Siya maoy gitumbok nga mipusil sa tulo ka mga lalaki nga naglakip sa biktimang si Rannie Cabasa Ragodos, 34, residente sa nahisgutang lugar.

Sa pasiunang imbestigasyon nila ni SPO4 Alex Dacua ug mga kaubanan nga sila si PO2 Edario Manatad ug PO2 Jodan Batucan nagbutyag nga ang biktima mitug-an nga siya ug iyang igsuong si Gregorio nanguha og kahoy para himuong uling sa gipanag-iya nga luna ni Panilagao.

Ang suspek nga kauban sa usa ka Michael Villanueva Ortiz, 44, residente sa sitio Bontores sa barangay Basak-San Nicolas siyudad sa Sugbu misyagit nga nagkanayon “ngano namutol man mo og kahoy?” ang biktima mitubag nga mga sanga ray ilang kuhaon apan giduol sila sa suspek.

Giingong armado nang daan ang suspek nga misulod sa balay sa biktima ug wala magdugay gipusil kini sa bukobuko.

Daling gidala ang biktima sa Cebu City Medical Center (CCMC) samtang ang opisyal daling miadto sa CCPO ug nakigkita kang Sr. Insp. Pablo Cabildo, hepe sa Cebu City Public Safety Company (CCPSC) kanhi Cebu City Mobile Group (CCMG).

Nagkanayon si Cabildo nga mianha sa iyang buhatan si Panilagao aron unta magpa- blotter kay gipamutol ang iyang mga kahoy didto sa nahisgutang lugar.

Matud ni Cabildo human siya masayod nga si Panilagao ang gilambigit sa pagpamusil siya maoy mibarog nga arresting officer sa maong opisyal.

Si Marissa nga asawa sa biktima, mianha usab sa CCPO ug positibong mitumbok kang Panilagao nga maoy mipusil sa iyang bana.

Matud pa ni Cabildo iyahang gidala si Panilagao uban sa mga sakop sa Homicide Section ngadto sa CCMC aron ipailawom sa liquor test nga diin positibo usab kining gitumbok sa biktima.

Si Panilagao hugtanong mihimakak sa pasangil nga siya maoy mipusil sa biktima. Dungan sa pagtahan sa iyang service firearm nga .45 nga kalibre nga dunay pito ka buhing bala sulod sa magazine niini nga aduna pay taptap sa sumbohan og packaging tape.

Laing nakuha nga ebidensya mao ang usa ka kabhang sa .45 nga kalibre sa armas ug usa ka Toyota Hi-Lux nga nagtangag sa plakang YCA-388 nga gipanag-iya ni Panilagao.

“Dili ta makaingon nga mao tong armasa gigamit,puwede man sad ilisan,” matud pang Cabildo kinsa gisuportahan usab ang maong pamahayag ni SPO4 Alex Dacua, “mahimong lain ang gigamit, pero mahimo sab taptapan og balik ang sumbohan.” - BANAT NEWS