Estudyante'ng Hapon gitulis

CEBU, Philippines - Usa ka tinun-an nga Japanese national nawad-an sa iyang salapi ug mahalong mga butang human kini tulisa didto sa barangay Mactan, dakbayan sa Lapulapu sa miaging gabii.

Ang biktima giila sa kapolisan nga si Taquino Kumarochi, 23, nga lumad nga taga Tokyo, Japan ug kasamtangang nagpuyo sa usa ka lodging house sa maong lugar.

Si Inspector William Humoc sa Theft and Robbery section sa kapolisan sa maong dakbayan miingon nga nagbarog lang sa daplin sa dalan sa maong lugar   ang biktima samtang nagpaabot og taxi.

Apan giduol kini sa duha ka wala hiilhing mga batan-ong lalaki ug gitionan og armas de fuego dungan ang pagdeklarar nga tulis.

Nakuha sa duha ka tulisan gikan sa biktima mao ang iyang pitaka nga adunay sulod nga 20,000 yen nga salaping Haponanon, digital camera nga nagkantidad og 30, 000 yen cellphone ug uban pa.

Ang maong langyaw kinsa walay nahimo gawas sa paghatag na lamang sa maong mga butang mitaho dayon sa   kapolisan apan wala pa masikop ang mga tulisan. - BANAT NEWS