CEBU, Philippines - Nagplano si Mayor Michael Rama nga makigtagbo sa mga kadagkoan sa call center dinhi sa Sugbo aron iyang awhagon nga palapdan ang ilang corporate social responsibility.
Sa samang higayon gusto usab sa mayor nga magbutang og mga medical practitioner ug psychologist sa mga call center aron manawag na lang kanila ang mga tawo nga buot magpatambag kanila ug sa maong paagi, daghan sila og matabangan niini sanglit 24 oras ang ilang operasyon.
Gihulagway sa mayor ang maong proyekto nga susama og programa sa radyo nga mohatag og tambag ngadto sa ilang mga tigpaminaw.
Apan niining higayona, ang mga eksperto nga call center agent maoy mohatag og tambag ngadto sa ilang mga caller.
Sa maong pamaagi, dali na lang kaayo makadawat og medical advice ang mga tawo nga dili hasol sa ilang kaugalingon.
Miingon si Rama nga paningkamotan niya nga sa sayong bahin sunod tuig, iya na nga mapadangat ang iyang plano ngadto sa mga kadagkoan sa call center.
Nahuna-hunaan kini sa mayor isip kabahin sa iyang programa ang panaghiusa sa gobyerno ug pribadong sektor sa paghatag og serbisyo ngadto sa komunidad. - BANAT NEWS