CEBU, Philippines - Naangol ang usa ka fruit vendor human dunggaba sa anak og polis samtang sila nagduwa og video karera machine sa barangay Ermita, ning siyudad sa Sugb kagahapon sa kaadlawon.
Ang biktima nga mao si Joel Sagavia, 35, fruit vendor ug nagpuyo sa Manalili Street, ang suspetsado mao si Roswell Pogoy, 28, taga Bato, Ermita ug anak ni SPO3 Roger “Tata” Pogoy nga nadestino sa dakbayan sa Lapulapu.
Segun sa pasiunang imbestigasyon sa homicide section sa Cebu City Police Office (CCPO) pinangulohan ni SPO1 Roger Nedamo nagbutyag nga ang biktima ug ang suspek nagduwa og illegal nga sugal nga video karera.
Sa dayon na nilang hulog sa sinsiyong piso, ang biktima nagpunay og katawa tungod kay nagsigi og kadaog samtang ang suspek nagsigi usab og kapilde hinungdan nga nagkalalis sila.
Ang suspek kinsa wala makaagwanta mikuha kini og kutsilyo ug gidunggab ang biktima ug nasabak kini sa abaga.
Ang biktima daling gidala sa tambalanan samtang ang suspek nga nisibat unta apan nadakpan sa hot pursuit operation nga gihimo sa kapolisan. (BANAT NEWS)