PNP-CPPO nalipay nga misaler ang kampanya vs. pabuto

CEBU, Philippines - Mapasigarbohon ang kapulisan sa probinsya nga mibutyag nga nagmalampuson sila sa ilang kampanya ug pagsuporta sa Department of Health (DOH) sa Oplan Iwas Paputok atol sa pagsaulog sa Pasko tungod kay maihap lang ang nabuthan ug nalandig sa mga tambalanan.

 Si Sr. Supt. Erson Diga,l hepe sa kapulisan sa probinsya mitataw nga dili sila magmika ug ilaha gihapong hingusgan ang kampanya sa publiko nga nag-awhag sa pagdili paggamit og bisan unsang matang sa mga pabuto atol sa pagsugat sa Bag-ong Tuig.

Matud sa kapulisan ang pagminus nga nalandig sa tambalanan nga nabuthan og pabuto niadtong pagsaulog sa Pasko, nagpakita kini nga ang katawhan ilabi na kadtong mga ginikanan na-edukar na sa nanglabay’ng katuigan ug ilang gitudlo ngadto sa ilang mga anak.

 Apan ang kapulisan nagtuo gihapon nga kadtong mga tawo nga wala mogamit og mga pabuto sa Pasko, ila kining gitagana ang pagpabuto atol sa pagsugat sa Bag-ong Tuig.

 Si Digal subling mimando ngadto sa iyang mga hepe sa kapulisan sa kalungsoran ug siyudad sa probinsya nga hingusgan ug monitoron sa ilang tagsa-tagsa ka hurisdiksyon kadtong namaligya ug nag-display og mga pabuto nga walay permit aron dakpon.

Awhag ni Digal sa publiko nga mas maayong dili nalang mogamit og pabuto atol sa pagsugat sa Bag-ong Tuig, ug kun mahimo mogamit nalang og bisan unsang klase nga butang nga ilang magamit pagsaba-saba sama sa sound system ug uban pa aron malikayan ang disgrasya.

Hugot usab ipa-monitor ni Digal ang mga sibilyang nagtinir og armas tungod kay posibling gamiton unya karung Bag-ong Tuig sa pagpasalba.

Base sa talaan sa buhatan sa DOH ug ingon man sa kapulisan nga matag sugat sa Bag-ong Tuig aduna gyuy malandig sa tambalanan human nabiktima sa stray-bullet mugna sa mga tawong walay lingaw ug magpabuto sa ilang armas atol sa pagsugat sa Bag-ong Tuig.

 Nanghinaot si Digal nga sama sa pagsugat sa Pasko walay mogamit og mga pabuto aron dili sila adto mamag-ong tuig sa tambalanan.

Sa kinatibuk-an nakatala lamang ang DOH-7 og kapin 15 ka mga biktima sa pabuto samtang walay bisan usa nga nabiktima sa stray bullet. (BANAT NEWS)