CEBU, Philippines - Patay ang usa ka trabahante sa buhatan ni Mayor Michael Rama human kini gidunggab sa usa ka lalaki samtang nakig-inom sa iyang mga higala pasado alas-7 sa miaging gabii diha sa sitio Lower Ipil-ipil sa barangay Capitol Site, siyudad sa Sugbu.
Ang biktima giila sa kapulisan nga mao si Emmanuel Olbeda, nagpuyo sa maong lugar ug barangay environment officer nga nadestino sa buhatan ni Rama.
Mitahan hinuon ang suspetsado diha sa Fuente Police station nga si Rogelio Sorenga, 37, walay trabaho ug nagpuyo sab sa maong lugar.
Segun sa pasiunang imbestigasyon ni SPO1 Roger Nedamo ug mga kaubanan sa Homicide Section nakig-inom ang biktima sa iyang mga higala niadtong higayona sa dihang kalit lang miabot ang suspek ug walay daghang pangutana gidunggab niini ang biktima sa wala nga dughan.
Ang biktima nga samaron daling gidala sa Cebu City Medical Center apan patay na kining nahiabot sa nahisgutang tambalanan.
Dugang imbestigasyon ni Nedamo ug mga kauban nga mitug-an kanila ang suspek nga ang iyang ig-agaw nga ginganlan og Jun-jun kanunay’ng gihadlok-hadlok sa biktima sa walay igong rason hinungdan nga nasuko siya sa biktima maong iyaha kining gidunggab. (BANAT NEWS)