Ombudsman nanghinaot nga mga politiko sa 2011 magtinarong na

CEBU, Philippines - Naglaom si Assistant Ombudmans sa Central Visayas, Virginia Palanca Santiago nga sa sunod tuig 2011, ang tuig sa mga koneho, ang mga opisyales sa gobiyerno apil na ang katawhan magbag-o. Kini maoy gipadayag ni Santiago sa interbyu sa DyRF dili palang dugay ug kini miingon nga dako pa ang kahigayunan nga magbag-o ang mga badlungong mga opisyales sa gobiyerno.

Iyang gitataw nga ang Ombudsman padayon nga nagpahigayon og mga siminar dili lamang sa mga opisyales sa mga Local Government Units kun dili apil na ang mga kawani sa gobiyerno.

Lakip na usab sa giseminar sa Ombudsman ang mga ubay-ubay nga mga pribadong sektor sa katilingban aron sila tudloang manginlabot ug magpakabana sa mga anomaliya nga nahimo sa ilang tagsatagsa ka mga opisyal ug isumbong kung gikinahanglan.

Matud pa ni Santiago nga buot siyang magbilin og dakong kausaban sa mga katawhan ug sa mga labaw nga opisyales sa nagkadaiyang ahensiya sa gobiyerno sa dili pa hingpit nga mo-retire sa iyang katungdanan sa Ombudsman.

Gikatakdang muretiro sa hingpit si Santiago sa iyang pagserbisyo sa Ombudsman karong tuig 2011. (BANAT NEWS)