Gumikan sa pabuto kusina nagkayo

CEBU, Philippines - Deriyot maugdaw ang kusina sa usa ka balay human tugpahi ang kisame niini og pabuto nga wala mahibaw-i sa barangay Cogon, East Poblacion, lungsod sa Carmen niadtong Sabado sa kaadlawon.

Ang maong kusina nahimutang sa likod nga bahin sa balay nga gipanag-iya ni Manuel Kiamco nga usa ka mag-uuma.

Ang grupo ni SFO1 Romeo Pono daling miresponde sa maong sunog ug napawong usab dayon kini human sa pipila ka gutlo.

Ang nahisgutang kusina ug ang kisame sa maong balay gigama sa gaan nga mga materyal.

Base sa imbestigasyon sa kabomberohan, ang kauga sa maong kisame maoy hinungdan nga naduktan dayon sa kayo gikan sa pabuto nga mitugpa sa maong dapit nga wala hisayri sa tagtungod.

Hinuon walay gikataho nga naangol sa maong sunog ug wala usab maugdaw sa hingpit ang nahisgutang kusina.

Gibana-bana nga P6,000 ang danyos sa maong sunog. (BANAT NEWS)