Armas gilunggob

CEBU, Philippines - Napakgang ang tinguha sa usa ka tawo sa pagpusil unta sa iyang silingan human lunggoba ang iyang armas sa lain usab niyang silingan sa sitio Villamanga sa barangay Opao sa dakbayan sa Mandaue sa miaging gabii.

Si Miguel Cabantugan, 30, ulitawo nga nagpuyo sa maong lugar maoy milunggob sa kalibre .38 nga puno sa bala gikan sa usa ka Dante nga usa ka construction worker sa maong lugar nga walay tinong address.

Si PO2 Ondo Cinco sa kapolisan sa Presinto 5 sa Opao Police Station miingon nga ang suspetsado nga nailhan lang sa ngalan Dante sa ilang lugar, gikalalis si Edwin Eleazar nga silingan niya, samtang nag-inom sila sa balay ni Teresita Cano.

Ang suspetsado nga wala makaagwanta sa ilang panaglalis, kalit nga milakaw ug pipila ka gutlo nahibalik kini nga nagbitbit na sa iyang .38 nga kalibreng revolver ug gipangita ang duha ka lalaki nga gikainom si Eleazar.

Giwara-wara ang dala niining hinagiban ug si Cabantugan   maoy misugat sa suspetsado ug daling gilunggob niini ang armas sa naulahi.

Dihang wala na siya’y armas,   mikaratil og dagan ang maong suspetsado pahilayo sa maong lugar sa kahadlok nga maoy mapusilan.

Ang nasakmit nga armas gidala ni Cabantugan sa kapolisan ug gitahan uban sa unom ka mga bala niini. (BANAT NEWS)