Briton nagpakuryente sa lawas tipi

CEBU, Philippines - Usa ka Briton nga giingong wala nay kwarta ang napalgang patay sulod sa giabangang lawak sa usa ka hotel ug gidudahang nagpakamatay pinaagi sa pagpakuryente sa iyang kaugalingon sulod sa maong lawak niadtong Disyembre 23 sa gabii.

Ang namatay mao si Andrew James Limbrick, 50, nagpuyo sa usa sa mga lawak sa barangay Pajo, dakbayan sa Lapulapu. Samtang dako ang pagduda sa kapolisan nga adunay babayeng gikauban si Limbrick sayo pa nianang adlawa sa wala pa kini mapalging patay.

Si SPO3 Ernesto Francisco ug PO3 Dioscoro Arong, imbestigador sa Homicide Section sa kapolisan sa maong dakbayan miingon nga ang room boy sa maong hotel maoy unang nakakaplag sa maong langyaw dihang giablihan ang lawak niini.

Si Limbrick gidala sa Mactan Doctors Hospital apan ang mga doktor sa maong tambalanan ang mideklarar niini nga dead on arrival.

Si Francisco miingon nga ilang gituohang naghikog ang maong langyaw pinaagi sa paghigot sa pinanitang wire sa telepono diha sa iyang bukton ug tiyan ug ang tumoy niini iyang tuslok sa outlet sa kuryente diha sa lawa hinungdan nga kini nakuryentihan.

Samtang nasuta usab base sa pasiunang pakisusi ni Francisco nga posibleng kwarta maoy problema ni Limbrick tungod kay sulod sa pipila ka semana na kining nag-abang sa maong lawak apan wala pa makabayad.

Matud pa ni Francisco nga dihang giadto sa room boy ang lawak ni Limbrick tuyo unta niining paninglan kini sa iyang abang human mosaad ang maong langyaw nga mobayad nianang adlawa apan nagabin-an nalang wala kini mopakita.

Wala say nakit-ang timailhan ang mga imbestigador nga adunay kaguliyang o komosyon nga nahitabo diha sa sulod sa lawak apan narekober nila ang telephone wire, passport sa biktima, ug mga gamit sa babaye.

Ang patay’ng lawas sa maong langyaw gikatakdang ipailawom sa awtopsiya aron pagtino sa tinuoray nga hinungdan sa kamatayon niini. (BANAT NEWS)