PNP-AFP magtinabangay kontra krimen, terorismo

CEBU, Philippines - Pormal nang gipirmahan kagahapon tali sa kadagkuan sa Philippine National Police (PNP) ug Armed Forces of the Philippines (AFP) ang AFP-PNP Joint Peace and Security Coordinating Center (JPSCC) atol sa panagtigom diha sa Police Regional Office headquarters nga nahimutang sa Camp Sergio Osmeña Sr.

Si PRO-7 Chief Supt. Ager Ontog Jr. nga nahinabi sa mga tigbalita nagkanayon nga ang katuyoan niini ang mapalambo ang koordinasyon tali sa PNP ug AFP pagsulbad sa tanang krimen lakip na ang counter-terrorism dinhi sa Visayas.

Nangulo sa maong tigom ang Central Command pinangulohan ni Lt. General Ralph Villanueva ug ang Directorate for Integrated Police Operation (DIPO) nga si Police Director General Jaime Calungsod.

Matud pa ni Ontog ang mga guidelines sa JPSCC susama ra sa Joint Regional Security Council Center (J-RSCC) atol sa nakalabay’ng lokal ug national election niadtong bulan sa Mayo diin ilang napatuman ang kahusay-kalinaw sa tibuok Visayas region lakip na dinhi sa Central Visayas hinungdan nga ilaha kining gi-activate karun.

Matud pa sa kadagkuan sa PNP nga sa wala pa ang signing kagahapon ila una kining gituki tali sa kadagkuan sa AFP ug unsay maayong epekto niini kun hingpit na kining mapatuman ang maong kasabotan.

Si Mayor Michael Rama nga maoy pinasidunggang dinapit nagkanayon nga dako kaayo kini og matabang ilabi na nga dunay dakong kalihokan karung bulan sa Enero nga mao ang Sinulog Mardi Gras.

 Siya mipadayag nga dili gyud paigo ang mga tanod ug ubang force multipliers nga mobantay sa minilyon ka mga tawong dumuduong atol sa maong kalihokan karung sunod buwan. (BANAT NEWS)