CAFGU sa Negros nakalingkawas

CEBU, Philippines - Nakalingkawas sa tinong kamatayon ang usa ka sakop sa Citizen Armed Forces Geographical Unit (CAFGU) human kini gibanhigan sa dili mominus dose ka gidudahang sakop sa New Peoples Army (NPA) niadtong Lunes sa gabii sa sitio Balansi sa barangay Humay-humayan sa lungsod sa Guihulngan Negros Oriental.

Si Major Christopher Tampus, tigpamaba sa Central Command nga nahinabi sa mga tigbalita miila sa gibanhigang sakop sa Cafgu nga mao si Larry Bustamante nga taga didto usab sa maong lugar.

Matud pa ni Tampus nga pasado alas-7 sa gabii niadtong Lunes gikan sa detachment si Bustamante ug padulong nang mopauli sa ilang pinuy-anan sa dihang kalit lang gipaulanan og bala sa gidudahang mga rebelde.

Apan maisip nga suwerte pa gyud si Bustamante human nakadagan ug wala maigo atol sa maong pagpangatake. Matud pa ni Tampus ilaha pa karung gisusi ang report nga responsable sa maong hitabo ang mga rebeldeng komunista.

Siya mitataw nga sa higayong ilang masuta nga mga NPA gyud ang ni-ambush kang Bustamante subay sa impormasyong nadawat nila, modangop sila sa GRP -Panel ug andam silang mosang-at og kaso sa responsable niini tungod sa kalapasan sa Ceasefire Agreement tali sa AFP-Central Command ug NPA.

Gipadayag usab niini nga ang AFP sensiro sa kasabotan sa ceasefire apan kun magpadayon kining gihimo sa NPA dako kini og epekto sa kasabotan.

Si Lt. General Ralph Villanueva, pangulo sa Centcom nagkanayon nga iyahang gimanduan ang tanan niyang sakop nga alerto sa tanang higayon bisan paman kun dunay kasabotan nga bilateral ceasefire gibutang nila sa defensive posture ang mga sakop. (BANAT NEWS)