CEBU, Philippines - Sa labing unang higayon, gipahigayon ang asembliya sa Association of Barangay Council, League of Municipalities of the Philippines ug Vice Mayors League sa Cebu International Convention Center kon CICC sa dakbayan sa Mandaue.
Ang katuyuan sa panaghugpong sa liga sa mga barangay, liga sa mga bise mayor ug liga sa mga mayor mao ang pagpakita ngadto kang Gobernador Gwendolyn Garcia nga sila andam mopaluyo sa iyang administrasyon niining iyang ikatulo ug katapusang tulo ka tuig nga termino sa pagkagobernador sa lalawigan sa Sugbo. Nangulo sa maong asembliya mao sila si Provincial board member Ribomapil “Joeyboy” Holganza Jr. ang presidente sa provincial Federation of Association of Barangay Council, Toledo city Vice mayor Arlene Zambo ang presidente sa Vice Mayors League ug Dumanjug mayor Nelson Garcia ang LMP Cebu Chapter President. Sumala pa ni Holganza nga ang tanang mga ABC presidents sa kalungsuran ug sa mga component cities mitamod gyud sa talagsaong liderato nga gipakita sa gobernador nga mibunga og mga maayo ug mapuslanong mga proyekto ug mga programa.Samtang gitumbok ni 3rd district Congressman Pablo John Garcia nga mitambong usab sa maong asembliya miingon nga ang lalawigan sa Sugbo nagkadako dili lamang tungod sa populasyon kun dili sa kadako sa nahimo sa mga lokal nga mga opisyales matag barangay, kalungsuran ug mga component cities. (BANAT)