Mananagat ipaseminar ni Ouano

CEBU, Philippines - Gisugyot ni Provincial Board Member Thadeo Ouano nga ipaseminar ang mga mananagat ning lalawigan alang sa alternatibong panginabuhian gawas sa panagat.

Kini ang reaction ni Ouano sa nahitabong pagkasikop sa mga mananagat sa dakbayan sa Talisay nga miresulta sa pagkawagtang sa usa ka Marine Watch sa lungsod sa Cordova nga gituohang gilumsan sa maong mga dinakpan.

Matud pa niya nga ang pagbaton og alternatibong panginabuhian sa mga mananagat dinhi sa lalawigan   maoy usa sa mga sugyot nga gipasukip niya sa giumol   niyang ordinansa nga nag-awhag sa ubang ahensya sa gobyerno sama sa   Department of Trade and Industry (DTI) ug uban pa nga motanyag og laing kapanginabuhian sa mga mananagat.

Gitataw ni Ouano nga nagkinahanglan usab nga duyogan sa mga mayor sa kalungsoran ug mga dakbayan sa lalawigan ang iyang ordinansa nga nagkinahanglan kini og public hearing.

Dugang pa niya nga nalakip na usab niini ang incentive sa mga fish warden nga mahimutang sa risgo ang ilang pagkabutang sa ilang pagtuman sa ilang trabaho sa pagbantay sa kadagatan.

Si Ouano nga maoy chairman sa committee on environment sa hunta probinsiyal nangayo sa suporta sa kagamhanan sa lalawigan nga gipangulohan ni Gobernador Gwendolyn Garcia alang ning maong katuyoan.

Gitataw niya nga ang gipalig-on sa gobernador   nga kampanya sa pagsumpo sa illegal nga panagat dinhi sa lalawigan molampos lamang kun magtinabangay ang tanang opisyal sa lokal nga kagamhanan, uban ang kapolisan. (BANAT)