Rama motukod bag-ong grupo

CEBU, Philippines - Naglaraw si Mayor Michael Rama ning dakbayan sa Sugbo nga motukod puhon og usa ka grupo nga tawagong Cebu City Volunteer Movement nga langkoban og mga tawo nga motambayayong sa mga serbisyo sa gobyerno nga komon nilang gipadangat ngadto sa publiko.

Nagkanayon ang mayor nga gusto niya nga maghiusa ang mga tawo sa pagtabang sa kampanya pag-protektar sa kalikupan, pag-ambit sa pag-monitor sa dagan sa trapiko, pagtubag usab sa mga emerhensya ug ingon man ang paghatag og suporta sa nagkadaiyang kalihukan sa local nga kagamhanan.

Sumala pa ni Rama nga kinahanglang mokooperar ang mga opisyales sa barangay sa maong laraw ug puwede usab nga mosalmot niini ang mga tinun-an.

Dugang pa niya nga kung kanunay ipatigbabaw sa publiko ang bayanihan, barangayan ug boluntarismo, tulin ug paspas gyud ang paghatag og igong programa ang gobyerno ngadto sa mga tawo.

 Dili pa lang dugay, mitunol si Rama sa tunga sa milyon ka pesos ngadto kang Mayor Maria Luisa Loot sa lungsod sa Daanbantayan isip tabang sa miaging Haladaya Festival.

Mipadala usab ang siyudad sa ilang mga doktor ug mga health inspector sa dihang nahitabo ang diarrhea outbreak sa dakbayan sa Danao.

Giawhag usab ni Rama ang ubang mga pribado nga sektor nga mohatag usab og igong oras sa pagtabang sa komunidad.

“Kung daghan ang motabang, mas daghan usab ang maserbisyohan,” nagkanayon ang mayor. (BANAT)