CEBU, Philippines - Pabiling missing ug gituohang gitambog sa dagat ang usa ka sakop sa Bantay Dagat sa iyang mga dinakpang giingong ilegal nga nanagat didto sa kadagatan sa barangay Day-as lungsod sa Cordova niadtong Lunes sa alas 8:00 pasado sa gabii.
Ang na-missing giila ni Senior Inspector Felix Pacaldo mao si Rudy Sultan, 50, taga sitio Bantayan, Poblacion ug sakop sa Bantay Dagat nga gitawag og Marine Watch sa maong lungsod.
Matud pa niya ang team sa ilang Marine Watch nga gipangulohan ni PO2 Charlie Valmoria nga nagpatrolya sa ilang kadagatan niadtong higayuna kauban ang mga sakop sa Marine Watch nga sila si Roseler Canete, Amad Inting, Chester Sosias ug ang na-missing nga si Rudy Sultan.
Si Pacaldo miingon nga nasigpatan nila ni Valmoria ang tulo ka pumpboat sa kadagatan sa Parola nga sakop sa barangay Day-as nga nanagat ginamit ang pukot.
Apan dihang ilang giduol usa sa maong mga pumpboat ang nakapasirit palayo ug gibiyaan ang pukot niini pinaagi sa pagputol niini samtang ang duha ka pumpboats ilang nadakpan.
Si Pacaldo miingon nga ang duha ka pumpboats nga nadakpan ang giluwanan sa upat ka mga nanagat nga giilang sila si Noe Lastimada, 35, Ruben Beyaya, 35, Luis Fernandez ug Dongcoy Yongco nga pulos molupyo sa barangay Pooc, dakbayan sa Talisay.
Dihang dad-on na ang upat, si Valmoria mikuyog sa duha ka dinakpan nga sila si Lastimada ug Beyaya padulong sa baybayon samtang si Sultan maoy gipasakay sa pumpboat sa laing duha ka dinakpan nga sila si Fernandez ug Yongco.
Samtang ang duha ka marine watchers nga sila si Sosias ug Inting mao usab ang nagsakay sa nasakmit nilang pumpboat ug nagsunod sa paglawig apan sa ilang pagdunggo wala makaabot ang pumpboat nga giluwanan ni Sultan ug sa duha ka dinakpan niini.
Tungod sa kabalaka dali silang mipalawod ug gisubay ang kadagatan apan wala na nila igkita ang pumpboat nga gisakyan ni Sultan ug sa duha ka dinakpan nga mananagat sa maong dapit.
Sa tanto nilang pagpangita naabot sila sa barangay Pooc sa dakbayan sa Talisay ug ilang nasigpatan sa baybayon sa maong dapit ang pumpboat nga giluwanan sa na-missing nga si Sultan ug sa duha ka dinakpan nga mananagat apan wala na nila igkita ang tulo.
Nagduda karon ang mga awtoridad nga posibleng gitambog sa dagat si Sultan sa duha ka mga mananagat nga nakaikyas una pa mipauli sa dakbayan sa Talisay. (BANAT NEWS)