CEBU, Philippines - Gitakda nga sugdan na sa unang bahin sa sunod tuig ang programa sa kagamhanan sa siyudad sa Sugbo ug sa Junior Chamber International (JCI) Metro Cebu Uptown nga tawgong City Hall At Your Door Step.
Sa maong programa, ang mga tawo mahimo na nga makapadangat sa ilang mga reklamo ngadto sa siyudad pinaagi sa pagpadala og text message diin ang number niini unya pa ihatag sa sunod tuig sanglit gihikay pa kini karon sa National Telecommunications Commission.
Matud pa ni Executive Vice President Vicente Lazaro sa JCI Metro Cebu Uptown nga tungod sa kadako sa siyudad adunay pipila ka mga problema nga dili dayon mabantayan sa gobyerno busa dako kaayo og tabang ang maong programa aron bisan sa pag-text nalang makapadangat ang publiko sa nagkadaiyang problema ngadto sa kagamhanan.
Pipila sa mga problema nga kinahanglang masayran dayon sa City Hall mao ang sama sa gubaon nga dalan, traffic light, wala makolekta nga basurahan, ug uban pa.
Dugang pa ni Lazaro nga may mga tawo sila nga mag-monitor sa mga mensahe gikan sa publiko sulod sa 24 oras ug ang problema nga ilang madawat ipaagi usab nila og bug-at nga balidasyon sa dili pa nila kini ipaabot ngadto sa nagkadaiyang departamento nga maoy mosulbad sa reklamo.
“Nagsilbi kini nga eyes and ears, aron dali dayon mabantayan kung unsay mga problema sa siyudad nga angayan hatagan og pagtagad. Basta ang tanang problema i-categorize gyud aron tulin ang dagan sa proseso,“ dugang pa ni Lazaro.
Gipaniguro usab ni Lazaro nga motabang sila og follow-up sa mga problema nga wala kahatagi og aksyon sa mga departamentong hingtungdan sa City hall. (BANAT NEWS)