Vendor milusad og signature campaign

CEBU, Philippines - Bisan pa sa mga pagsupak sa mga manindahay, ang kagamhanan sa dakbayan sa Talisay hugtanon gyud nga mopatuman sa pagpabalhin sa mga manindahay gikan sa daang merkado sa barangay Tabunok ngadto sa market-cum-terminal sa barangay Lagtang.

Ang Public Information Officer (PIO) sa siyudad nga si Arturo Bas mibutyag nga “gradual basis” o hinayhinay lang nga paagi ang ilang pagpatuman niini kung mahuman na ang circumferential road sa maong lugar.

Ang nahisgutang circumferential road nga gisugyot ni Konsehal Rodolfo Cabigas, chairman sa committee on infrastructure anha magsubay sa kilid sa sapa sa Mananga paingon ngadto sa bag-ong merkado sa Lagtang aron sayon kaayong kaagian sa mga mamalitay.

Apan ang mga manindahay sa merkado sa Tabunok nagpahigayon og signature campaign agi og pagtutol nila sa pagbalhin ngadto sa bag-ong merkado.

Ang maong vendor nabalaka nga mawagtangan sila og mga kostumer kung mobalhin sila ngadto sa bag-ong merkado tungod kay layoan na kini ngadto.

Matud sa mga vendor nga mas pabor sa mga pumapalit ang merkado sa Tabunok busa bisan mawagtang ang merkado sa maong lugar magpabilin lang gihapon sila bisan anha nalang sila moladlad sa ilang mga baligya taliwala sa karsada.

Kini tungod kay nasayud sila nga ang mga mamalitay gikan sa Poblacion, Talisay, taga dakbayan sa Sugbo , lungsod sa Minglanilla ug dakbayan ganahan gyud sa Tabunok mangompra.

Ang mga vendor nakakuha na og ubay-ubay nga mga pirma lakip na sa mga mamalitay. Ang maong mga pirma maoy gamiton nila sa ilang iduso unyang petisyon batok sa ilang pagbalhin ngadto sa bag-ong merkado. (BANAT NEWS)