CEBU, Philippines - Napahak ang ulo sa usa ka 75 anyos nga lalaki human kini ligira og tigbas sa iyang kontra didto sa barangay Kalubihan, sa barangay Baliang, dakbayan sa Danao sa miaging hapon.
Ang biktima mao si Quirino Tutor Avila, minyo ,nga nagpuyo sa maong dapit, samtang ang suspetsado nailhan usab nga si Nasario Perez Puerta, 29 , nga taga barangay Looc sa mao gihapong dakbayan.
Si SPO4 Edgar Gomez sa kapolisan sa maong dakbayan nga nahinabi sa Banat News mibutyag nga naglingkod sa tugkaran sa ilang balay ang biktima dihang kalit lang mitumaw ang suspetsado ug dayong ligid og tigbas sa biktima.
Matud pa ni SPO4 Gomez nga ang suspetsado nga mitahan ngadto kang kapitan Rudy Morales sa barangay Baliang, kagahapon pa usab sa buntag ihatod sa naulahi ngadto sa buhatan sa kapolisan sa Danao.
Dugang pa ni SPO4 Gomez nga gawas nga napahak ang bagolbagol, sa biktima, nabulit pa gyud sa daghang samad ang kalawasan niini agi sa hait kaayong sundang nga gigamit sa suspetsado sa paghabas kaniya.
Gihatod dayon ang biktima ngadto sa Danao District Hospital apan gibalhin kini sa Vicente Sotto Memorial Medical Center sa dakbayan sa Sugbo, samtang kasamtangan usab nga gitanggong ang suspetsado sa Danao Police Station. (BANAT NEWS)