Sanchez mi-ulbo kay pangalan isip presiding officer wala ibutang

CEBU, Philippines - Miulbo ang sapot ni Bise Gob. Gregorio Sanchez, Jr. atol sa katapusang sesyon ning tuiga sa Hunta Probinsiyal kagahapon human dili iyang pangalan ang nabutang sa lamesa isip presiding officer kun dili ang pangalan ni Bokal Agnes Magpale.

Ang kasuko ni Sanchez gipunting niya ngadto kang Provincial Secretary Aniceta Pasaylo kinsa dali usab nga nangambot sa nahitabo.

“The secretariat here might want the presiding officer be replaced,” nagkanayon si Sanchez.

Ipaesplikar ni Sanchez kang Pasaylo pinaagi sa suwat ang maong insidente.

Si Magpale nanalipod usab kang Pasaylo ug matud pa niini wala mailisi ang iyang pangalan tungod kay sa milabay’ng sesyon siya (Magpale) mao ang presiding officer.

Matud pa usab ni Pasaylo nga wala tuyoa ang maong hitabo ug nataligam-an lang nga wala mabutang ang pangalan ni Sanchez sa iyang lamesa sa wala pa nagsugod ang sesyon kagahapon.

Sukad sa nahitabong panagbangi tali nila ni Sanchez ug Gob. Gwendolyn Garcia aduna nay ginagmay’ng mga kasikas diha sa Hunta Probinsyal sanglit kadaghanan sa mga sakop ni Sanchez mga kaalyado sa gobernador. (BANAT NEWS)