Manag-uyab giluba, 1 pata

CEBU, Philippines - Patay nang nahidangat sa tambalanan ang usa ka lalaki samtang ang kuyog niini nga uyab anaa pa karun sa makuyaw nga kahimtang human sila gipangdunggab sa wala mailhing tawo pasado ala-una sa kaadlawon sa miaging adlaw sa San Francisco airstrip sa barangay Northern Poblacion lungsod sa San Francisco.

Ang mga biktima nailhan nga sila Allan Barcenas, 24, molupyo sa sitio Ubo-ob barangay Monte Alegre ug ang 17-anyos niining uyab pulos molupyo sa sitio Bakhaw barangay Esperanza sa nahisgutang lungsod.

Base sa imbestigasyon sa kapolisan sa lungsod sa San Francisco nasayran nga ang manag-uyab nagsakay sa usa ka motorsiklong gimaneho ni Barcenas padulong mosulod sa maong gamay’ng tugpahanan.

Matud pa mihunong ug mikanaog si Barcenas aron tubagon ang cellphone ug gibilin ang 17-anyos niyang uyab sa motorsiklo samtang si Barcenas mitubag sa cellphone dihang kalit lang nga mibutho ang wala mailhing lalaki ug gidunggab ang babaye sa likod.

Si Barcenas nga miaksyon og duol kalit usab kining gidunggab diha sa walang dughan ug sa kahadlok sa mga biktima nagkatibulaag sila og panagan.

Naatlan nga adunay barangay tanod nga nagpatrolya sa maong lugar maoy nakakita kang Barcenas nga nagbuy-od ug nagkadugo hinungdan nga gidali kini pagdala sa Recardo Maningo Memorial Hospital apan milabay ang pila ka oras namatay kini.

Tungod niini gilusad ang pagpangita sa uyab niini ug kini nakit-an sa mga polis diha sa kalibunan nga luya na kaayo ug gidali nila pagdala sa susamang tambalanan apan gibalhin kini sa usa sa mga tambalanan sa syudad sa Sugbo.

Ang kapolisan misubay pa karun kun si kinsa ang mamumuno ug unsa ang motibo niini sa pagpanunggab sa manag-uyab. (BANAT NEWS)