Finalist sa talentadong pinoy gikawatan

CEBU, Philippines - Usa ka singer nga finalist sa sikat nga tv show nga “Talentadong Pinoy” ang nabiktima sa mga kawatan samtang nag-perform sa Christmas party nga gipasiugdahan sa usa ka kompanya diha sa barangay Poblacion lungsod sa Asturias kagahapon sa kaadlawon.

Ang nabiktima mao si Analou Reyes, 30, dalaga, taga siyudad sa Mandaue ug finalist sa “Talentadong Pinoy” nga guest performer sa maong kalihukan.

Si Asturias Vice Mayor Joel Dumdum maoy tag-iya sa Dumdum Marine Services ug nagselebrar sa iyang mga kawani kagahapon sa ala 1:00 sa kaadlawon sa maong lungsod ug bukas kini sa publiko tungod sa ubang live band concerts.

Pito ka mga suspek ang gidakop ug giimbestigar sa kapulisan nga mao sila si Roel Maranga Aliriado, 24 ,taga Poblacion; Philip Medel Jr., 19, taga Looc Norte; Ronald Asigurado, 20, taga Poblacion; Ricardo Ramirez, 20, taga Lupa Sapangdaku syudad sa Sugbo; Jonnie Tan, 20, taga Looc Norte; Lorenz Escone, 23, taga Looc Norte ug Ariel Alcoriza, 25, taga Poblacion Asturias, pulos mga nanan-aw sa kalingawan.

Si SPO2 Dennis Nocos sa pakighinabi sa Banat News miingon nga base sa iyang impormasyong nadawat, si Medel anak ni Philip Medel nga usa sa gipasanginlang mga suspek sa pagpatay sa beteranang artistang si Nida Blanca pipila ka tuig na ang nakalabay. Ang mga nahanaw nga butang mao ang kwarta nga P30 mil, bag, digital camera, tulo ka cellphone, sunglass, pitaka, short pants, blouse, make up kit ug passport. Matud ni Insp. Danilo Santillan, hepe sa Asturias Police dihang nahinabi sa Banat News samtang nagkanta ang biktima nga nilingaw sa mga kawani nakahigayun og kuha ang mga suspek nga walay labot sa maong okasiyon sa bag sa biktima nga gibilin sa lingkuranan samtang nagkanta kini mga alas 12:45 sa tungang gabii.

Diha na mahibaw-i sa biktima human sa iyang pagkanta nga nahanaw na ang iyang bag sa iyang gilingkoran hinungdan nga gi-report dayun kini sa kapulisan ug sa pagresponde sa mga polis dunay nakahatag og impormasyon sa usa sa mga suspek nga nadakpan dayun ug gisukit-sukit ug mao nay mitug-an sa tanan niyang mga kauban.

Daling nipahigayun og operasiyon ang kapulisan ug nangasikop dayun ang mga suspek ang sagad nila didto na sa ilang pinuy-anan gi-pick up ug na-recover ang mga butang niini apil na ang tulo ka cellphones gawas sa kwarta ug sa digital camera. (BANAT NEWS)