Lapida maker sa 'menteryo mag-Pasko
CEBU, Philippines - Sa sementeryo na mag-Pasko ang usa ka mamuhatay og lapida human kini gipusil sa duha ka wala mailhing tawo samtang naglingkod kilid sa nag-parking nga multicab sa miaging hapon diha sa sitio Cahipa sa barangay Hipodromo, siyudad sa Sugbu.
Ang biktima kinsa nahiagom og daghang samad pinusilan sa kalawasan gideklarar nga dead on arrival sa Vicente Sotto Memorial Medical Center (VSMMC) mao si Nicepuro Almonicar, 33, nagpuyo sa barangay Hipodromo.
Sigun sa report sa Homicide Section sa Cebu City Police Office (CCPO) nga miabot sa dapit ang duha ka wala mailhing lalaking luwan sa motorsiklo ug ang angkas niini maoy mikanaog ug miduol sa biktima nga naglingkod niadtong higayona dayong pusil sa makadaghang higayon.
Human sa hitabo ang kriminal yano rang milakaw balik sa nagpaabot nga kauban ug daling mipasirit sa motorsiklo palayo sa lugar.
Samtang ang biktima daling gidala sa tambalanan apan patay nang daan pag-abot sa VSMMC tungod sa daghang samad nga naangkon.
Ang kapulisan nga miresponde sa nahitaboan nakakuha og unom ka kabhang sa gituohang kalibre .45 nga armas.
Ang mga imbestigador pinangulohan ni SPO3 Rey Cuyos padayong nanghipos og dugang impormasyon aron masayran ang hinungdan sa pagpatay sa biktima.
Usa sa gitutokan nga anggulo sa kapulisan mao ang personal nga atraso sa biktima diha sa nahisgutang lugar. (BANAT NEWS)
- Latest
- Trending
