CEBU, Philippines - Gisugdan na kagahapon sa kagamhanan sa siyudad sa Sugbo ang pagpangguba sa 12 ka barong-barong sa Pasil Fish Port diin mikapin sa 15 ngadto sa 20 ka pamilya ang naapektohan niini.
Ang maong dapit maoy balhinan puhon sa mga fish vendor nga kasamtangang naninda sa Pasil Fish Market nga nahimutang sa atubangang bahin sa San Nicolas Church.
Gusto sa mayor nga himoong public plaza ang maong dapit aron presentable kini nga lantawon sanglit anaa man kini atubangan sa simbahan.
Kung madayon ang paghimo og public plaza, butangan usab kini og playground sa mga bata kay buot ni Rama nga mahatagan og importansya nga matiman-an sa kabataan ang mga maayong proyekto sa gobiyerno alang kanila.
Samtang giklaro ni Rama nga wala’y relocation site ang mga naapektohang pamilya sa demolisyon ug iya kining gitambagan nga mobalik sila sa ilang gigikanang mga lugar.
Gitataw niya nga usa kini sa iyang baruganan nga tul-iron ang mga kahiwian nga makiangayon alang sa tanan.
Gusto ni Rama nga malimpiyo ang maong lugar sanglit aduna siya’y nadawat nga report nga gihimo nang labayanan sa basura ang dagat sa Pasil Fish Port.
Pipila na ka tuig nga wala magamit ang Pasil Fish Port busa gipamuy-an na kini sa mga “informal settler”, matud pa niya.
Malinawon ang demolisyon sanglit adunay mga sakop sa kapolisan nga mikuyog sa operasyon samtang ang Cebu City Fire Department ug Department of Public Services (DPS) mipadala usab sa ilang mga kawani ngadto sa maong lugar aron sa paglimpyo niini. (BANAT NEWS)