Mga isdang nangamatay dili ipakaon

CEBU, Philippines - Higpit nga gipahimangnoan ni Lapulapu City Administrator Teodolo Ybanez ang mga molupyo sa barangay Ibo ug sikbit nga barangay sa Pusok sa dili pagkaon sa mga isdang nangamatay nga ilang makuha sa kadagatan sa maong dapit.

Ang maong pahimangno ni Ybanez gihimo aron malikay ang mga molupyo sa peligrong sangputanan sa ilang lawas sanglit wala pa man masiguro ang nakaingon sa dinaghang pagkamatay sa mga isda.

Si Ybanez sa iyang press statement miingon nga gihimo pa ang pagtuon sa water sample ug mga patay’ng isda sa buhatan sa Department of Health (DOH) ug molanat pa og upat ka adlaw una hisayri ang resulta sa laboratory test nga gipahigayon.

Matud pa niya nga ang mga opisyal sa kabarangayan sa maong lugar maoy ilang gitahasan sa pagbadlong sa mga molupyo nga palikayan ang pagkaon sa mga isdang patay nga ilang napunitan ug nasarap sa kadagatan.

Hinuon ang buhatan sa Bureau of Fisheries and Aquatic Resources (BFAR) kinsa mihimo usab og pakisusi sa kadagatan sa maong lugar misalikway   sa mga balita nga may fish kill sa maong dapit.

Gipadayag nila ang pagtuo nga posible nga gikan sa lawod ang maong mga isda ug mipadaplin kini aron paglikay sa dagkong mga mambad sa dagat nga buot mosubad kanila.

Nagtuo ang BFAR nga naluya ang maong mga isda sa ginukdanay hinungdan nga sila mihutlay ug nangamatay.

Apan si Dr. Rodulfo Berame nga maoy city health officer sa dakbayan sa Lapulapu mipadayag sa iyang pagtuo nga adunay nanagat sa maong dapit nga migamit og koskos o kaha kuryente nga maoy nakapakalas sa maong mga isda. (BANAT NEWS)