Balay sa policewoman ugdaw

CEBU, Philippines - Naugdaw ang panimalay sa ginikanan sa usa ka policewoman sa lungsod sa Argao pasado alas-10 kagahapon sa buntag sa sitio Tawog barangay Taloot lungsod sa Argao.

Ang panimalay ni PO2 Vivian Tamayo, naugdaw sulod lang sa pipila ka minutos human wala mabantayi sa amahan niini nga nagpahuway sa gawas nga bahin sa ilang panimalay.

Ang maong sunog giisa lang sa 1st alarm ug gibana-bana nga midanyos og P150 mil.

Sa pakighinabi sa Banat News ni Ruben Tampos usa sa mga silingan ni Tamayo nga mitabang sa pagpawong sa kalayo mibutyag nga dali kaayong midako ang kalayo.

Si Tampus mitabang pa pagpangaswat sa mga butang apan tungod sa kapaspas pagdako sa kalayo wala na nila masalbar pa ang ubang kabtangan.

Samtang sa pakighinabi sa Banat News sa usa sa mirespondeng bombero nga si FO1 Angelito Alcarez mibutyag kini nga base sa ilang nakuha nga impormasyon gikan sa amahan ni Tamayo nga si Gaspar Bucog mibutyag kini nga ang ila nang mga silingan maoy nakabantay sa pag-ulbo sa kalayo.

Giingong natulog si Gaspar nianang tungura diha sa sala nga bahin sa maong panimalay samtang ang ilang labandera nanglaba sa likod.

Butyag usab ni Alcarez nga sa gipahigayon nga inspeksyon sa Fire Investigator nga si FO2 Joel Mecares nasayran nga electrical misuse ug gidudahang ang hinungdan mao ang usa ka electric fan nga bisan paman og wala mag-andar apan wala kini maibot.

Adunay miingon nga nalangan pagresponde ang mga bombero sa lungsod sa Argao apan midepensa si FO1 Alcarez tungod kay ang gilay-on gikan sa lungsod sa Argao patubang sa nahitaboan 10 kilometros nga molanat og kapin 10-minutos hinungdan nga dili gyud malikayan nga malangan sila. (BANAT NEWS)