2 bata ang namatay sa dengue

CEBU, Philippines - Laing duha ka mga bata ang labing bag-o nga nakalas gumikan sa sakit nga dengue hinungdan nga moabot na ngadto sa 20 ang nangamatay sa maong sakit sukad niadtong Enero hangtud karong buwana.

Ang bag-ong nakalas sa dengue mao sila si Jhonel Decatoria, 11-anyos , taga barangay Pasil ug Frixie Arches, 9-anyos nga taga barangay Tisa niining dakbayan.

Matud pa nga gidala si Decatoria sa iyang mga ginikanan sa Visayas Community Medical Center niadtong Disyembre 4 gumikan sa grabe nga hilanat apan namatay dayon kini pagkasunod adlaw.

Samtang si Arches, gidala sa Cebu City Medical Center (CCMC) niadtong Disyembre 10, apan namatay dayon human sa upat ka adlaw.

Nagkanayon si assistant city epidemiologist Durinda Macasocol nga bisan paman nga mga bata ang kasagaran nga naigo sa maong sakit, dili gihapon kini angayan kompiyansahan sanglit duna na’y 102- anyos ang nataptan sa dengue.

Dugang pa ni Macasucol nga bisan 20   na ang nangamatay sa dengue karong tuiga, minos kini kumpara sa 37 sa miaging tuig.

Gipadayag hinuon ni Macasucol nga bisan sa   kadaghang kaso sa dengue karong tuiga, apan minos ra ang nangamatay itandi sa miaging tuig.

Nasayran nga miabot na ngadto sa 2,828 ang nataptan sa dengue sukad niadtong Enero kumpara sa 1,975 ka mga kaso sa susamang period sa miaging tuig.

Ang unang lima ka mga barangay sa dakbayan ang adunay daghang kaso dengue naglangkob sa Guadalupe, 241; Tisa, 152; Labangon, 127; Talamban, 115; Punta Princesa, 114 ug Lahug, 110.(Uban sa reporter ni Rene U. Borromeo sa The Freeman) (BANAT NEWS)