2 anyos gilugos sa higala sa iyang papa

CEBU, Philippines - Usa ka 2-anyos nga bata ang gilugos sa usa ka lalaki diha sa barangay Looc, Santander niadtong miaging Miyerkules sa hapon.

Nahitabo ang maong insidente sa panimalay mismo sa biktima dihang usa ka 38-anyos nga lalaking silingan sa biktima ang misulod sa ilang lawak ug miabuso sa maong bata pinaagi sa pagpasulod sa tudlo niini sa kinatawo sa biktima.

Ang 23-anyos nga amahan sa bata nga maoy midangop sa kapulisan sa Santander human masuta sa iyahang asawa nga nagkadugo na ang kinatawo sa ilahang anak nga babaye ug gitug-anan sa gibuhat sa suspek niini. Tungod niini ang kapolisan daling midakop sa suspek ug gibalhog sa prisohan sa Santander.

Si PO3 Gabriel Defcartin sa dihang nahinabi sa Banat News mibutyag nga ang suspetsado gipapuyo lang sa pamilya sa biktima sa ilahang balay tungod kay gisalikway kini sa iyahang kaugalingong pamilya.

Tungod kay kaila ra nila ang suspetsado naluoy sila ug gipa-istar lang kini sa ilahang panimalay. Giingong hubog ang suspek atol sa paghimo niini sa maong krimen.

Sa paghimo niining balita, ang suspetsado gidala sa siyudad sa Sugbo uban si PO2 Catherine Gumagay sa Women’s Desk kuyog ang biktima ug ang pamilya niini aron mapasakaan og kaso tugbang sa iyahang gihimong krimen. (BANAT NEWS)