Pagkao'g tambok, parat likayan - DOH

CEBU, Philippines - Gitambagan sa Department of Health (DOH)-7 ang publiko nga mag-amping sa panglawas ilabi na karong Pasko ug Bag-ong Tuig pinaagi sa dili pagpatuyang pagkaon og tambok, parat, tam-is ug idili usab magpatuyang pag-inom sa mga ilimnong makahubog.

Kini aron malikayan ang mga sakit sama sa high blood nga piligro karong panahona gumikan sa kaabunda sa lechon   nga anaa sa mga Christmas party.

Matud ni DOH-7 Regional Director Susana Madarieta nga labing maayo kontrolahon gyud sa kaugalingon ang pagkaon ug dili magpatuyang sa pagbusog aron malikayan ang mga gikabalak-ang piligro.

Ang mga sakit nga posibleng motumaw ning mga panahona mao ang altapresyon kansang sintoma mao ang pagpanakit sa tangkugo.

Gisugyot usab ni Madarieta ang pag-inom og daghang tubig kay makatabang kini sa pagpamenus sa risgo sa pagsaka sa blood pressure nga maoy makaingon sa ataki.

Apan alang niya mas labaw nga makaayo kun batonan ang pag-amping pinaagi lang sa pagkaon og husto ug dili pasubrahan tungod kay bisan unsang butang basta masubrahan piligro ug makadaot gyud sa panglawas sa tawo. (BANAT NEWS)