Madre patay, 11 nangaangol

CEBU, Philippines - Patay ang usa ka madre samtang onse ang naangol human mabalintong ang ilang gisakyang multicab de pasaheroan niadtong milabay’ng hapon sa sitio Bachao, barangay Catmon-Daan lungsod sa Catmon.

Ang dead on arrival nailhan nga si Sister Editha Villafuerte, usa sa mga madre nga nagserbisyo sa Passionist School nga tunghaan alang sa mga babayeng naglaraw mosulod sa bokasyon sa pagka-madre diha sa maong lugar.

Ang mga naangol mao sila Arlene Tabuada, 39, Judith Baylon, 53, Laured Yiray, 15, Lester Tina, 16, Ronald Olipano, 16, Raymundo Tabal, 45, Alfonsa Aris, 32, Tenny Baclayon, uban sa iyang mga anak nga sila Joana Marie, 15, Jeffrey, 6, ug Joshua, 4.

Base sa inisyal nga imbestigasyon sa kapolisan sa lungsod sa Catmon nasayran nga ang multicab gimaneho ni Teodulo Cape maoy gisakyan sa madre ug sa laing onse ka pasahero.

Samtang nagbiyahe giingong kalit nga nabalintong ang multicab ug ilang nabantayan ang bus nga misungag sa ilang gisakyang multicab.

Tungod niini maayong pagkabalitok sa makatulo ka higayon s a mas gamay’ng sakyanan nga giluwanan sa mga biktima miresulta sa pagkaangol sa mga sakay niini ug pagkakalas sa maong madre. 

Matud pa sa traffic investigator sa lungsod sa Catmon SPO3 Asisclo Boto nga base sa mga nakasaksi pagkabalintong sa ilang sakyanan nakakita sila og uasa ka bus sa ilang luyo apan wala sila hunongi niini.

Midugang si Boto nga mibutyag usab ang mga saksi nga ang namatyan sa madre mao ang iyang pagkapiit ngadto sa sakyanan ug nakaangkon kini og mga samad.

Ang mga biktima nga samaran dali usab nga gidala ngadto sa Danao District Hospital tungod sa kadaot niini sa lawas nga ilang naangkon.

Kagahapon sa buntag usa ka Roberto Camay, 51, drayber sa The Rough Rider Bus nga mao ang gipasabot nga bus sa mga pasahero mihimakak nga naigo niini ang maong multicab.

Susihon pa karon sa kapolisan kun adunay deperensya ang multicab sanglit adunay pasaherong naangol nga mibutyag nga wala sila masaghiri o madumboli sa maong bus. (BANAT NEWS)