Gubat sa PNP ug NPA suspenso

CEBU, Philippines - Gipatuman sa Police Regional Office-7 ang Suspension of Police Operation (SOPO) sugod niadtong Huwebes sa tungang gabii batok sa New Peoples Army (NPA) sa mga lugar nga ilang giyak-an ilabi na didto sa isla sa Negros .

Gumikan niini mimando dayon si Sr. Supt. Erson Digal, hepe sa kapolisan sa lalawigan sa mga hepe sa kalungsoran nga ipatuman ang mando sa PRO-7.

Apan nagkanayon si Digal nga wala kini magpasabot nga hunongon usab ang ilang operasyon batok sa mga kriminal ug sa kampanya sa tanang klase sa illegal nga kalihokan ilabi na ang ginadiling drugas.

Ang kamanduan sa PRO-7 libkason sa tungang gabii sa Enero 3 sa sunod tuig.

Sa samang higayon ang maong mando gipatuman usab sa Central Command ug matud pa ni Major Christopher Tampus tigpamaba sa CentCom nga bisan tuod kung dunay kasabotan ang kasundalohan tali sa NPA, apan wala kini magpasabot nga mohunong sila sa monitoring sa mga lugar diin adunay nahitabong engkuwentro tali sa mga sundawo sa kagamhanan ug rebeldeng komunista.

Ang mga sakop sa militanteng pundok daan nang mipadayag og kabalaka nga dili seryosohon sa kasundalohan ang kasabotan sa bilateral ceasefire ug ipadayon gihapon ang ilahang combat operation.

Apan si Tampus mihagit sa mga militante sa pagmonitor sa kalihokan sa military aron mapiho nila nga tininuod ang pamahayag sa mga sundawo sa gobyerno. (BANAT NEWS)