Namadlong sa nangulata giluba

CEBU, Philippines - Nadunggaban ang usa ka ulitawo kinsa mibadlong sa tawo nga mikulata   sa usa ka bayong-bayong didto sa barangay Tapon sa lungsod sa Dalaguete sa miaging kaadlawon.

Ang biktima mao si Carzon Osorio, 23, ulitawo, nga taga Tapon, samtang ang suspetsado nailhan lang sa ngalang Gilbert , lumad nga taga Gacarpo, barangay Tuba, apan kasamtangang nagpuyo sa sitio Danao, barangay Balud, sa maong lungsod.

Samtang ang 17 anyos nga bayong-bayong nga gipatay-patay og kulata sa suspetsado giila usab nga si Jaime Belhida, 17 nga taga sitio Solong-on, Tapon sa maong lungsod.

Si PO2 Cerilo Glipa sa Dalaguete Police Station mibutyag sa Banat News nga si Belhida padong na sa ilang balay kauban ang mga barkada niini nga sila si Joselito ug Bryan pulos taga Solong-on,Tapon.

Apan ang suspek kinsa nagsunod nang daan sa biktima kalit kining nanukmag kaniya human mangutana kun kaila pa ba kaniya ang bayong-bayong.

Nasabak sa mata ang biktima ug dihang natumba gilubok sa iyang kinumo, giyatakyatakan ug gipatid-patiran.

Si Osorio nga mao usay pag-abot sa maong lugar nakakita sa makaluluoy’ng kahimtang sa bayong-bayong busa misuway kini og badlong sa suspek.

Apan imbis patuo, milanit hinuon sa iyang kutsilyo ug gihansakan ang tiyan sa biktima, maayo nalang nakalihay, busa didto motaroy ang tumoy sa kutsilyo sa ubos sa iyang paa.

Misirit dayon pahilayo ang suspek samtang ang duha ka biktima gihatod dayon sa tambalanan sa dakbayan sa Sugbo. (BANAT NEWS)