CEBU, Philippines - Naangol ang tulo ka mga trabahante sa usa ka construction firm human kini buthi sa shot gun sa guwardiya sulod sa construction site sa barangay Looc, dakbayan sa Mandaue, sa miaging gabii.
Ang biktima mao si Eder Opposa, 46, minyo, Joseph Jakosalem, 2, ulitawo, ug Flaviano Binlot, 56, pulos lumad nga taga Canlaon, Negros Occidental.
Samtang ang guwardiya nga maoy nakapabuto sa shot gun mao si Ruel Tolones, 25 , ulitawo, nga taga Nivel Hills, barangay Lahug, dakbayan sa Sugbo.
Si PO3 Gregorio Cabisarez sa kapolisan sa Presinto 5 sa Opao Police Station sa kapolisan sa Mandaue City Police Office (MCPO) nga nahinabi sa Banat News miingon nga nakablit sa suspetsado ang gatilyo sa kargada niining shot gun atol sa iyang pagkarga og bala nga maoy hinungdan sa aksidenteng pagboto niini.
Ang tulo ka biktima kinsa diha tupad niya maoy nasabak sa mga bala, busa gihatod dayon kini sa tambalanan sa dakbayan sa Sugbo.
Ang suspetsado mitahan dayon sa kapolisan ug nagtingkagol na karon sa prisohan samtang nagpaabot sa kasong iyang atubangon (BANAT NEWS)