DOH-7 Mangunay sa gubat vs tipos sa alegria

CEBU, Philippines - Pormal nang mi-takeover ang Department of Health -7 sa kampanya batok sa sakit nga typhoid fever kon tipos sa lungsod sa Alegria aron maoy mangulo sa agresibong kampanya batok niini.

Ang Regional Epidemiology Surveillance Unit (RESU)-7 nga si Renan Cimafranca maoy nangunay og superbisar pag-monitor sa sitwasyon sa maong lungsod kagahapon diin pormal na usab nga gipaubos ang orientation seminar sa tanang mga barangay health workers sa maong lungsod inabagan usab sa mga municipal health officer sa Alegria.

Matud ni Cimafranca ang maong mga barangay health workers mao na unya ang tahasan nga maoy mopahigayon og house to house campaign aron matudloan ang mga molupyo sa angayang buhaton.

Usa sa gisugyot mao ang pagsigurong pagpabukal og tubig sulod sa kinse minutos ug ingon man ang pagbutang og chlorine sa ilang water sources.

Gipadayag sa DOH-7 nga kontaminado ang tinubdan sa tubig mainom sa maong lungsod nga maoy nakaingon sa pagkuyanap sa maong sakit.

Sukad kagahapon niabot na og 650 ang natalang nataptan niini ug ang labing uwahing biktima mao ang 15-anyos nga taga Poblacion, Alegria nga namatay sa milabay’ng adlaw.

Gibutyag ni DOH-7 director Susana Madarieta nga na-alarma na sila sa maong panghitabo hinungdan nga gilusad nila karun ang agresibong kampanya ug nagpadala na usab ang DOH og dugang mga tambal alang sa mga pasyente.

Giangkon ni Madarieta nga mas lisud sumpuon ang maong sakit itandi sa diarrhea outbreak nga nasinati sa siyudad sa Danao sa mga nangaging semana. (BANAT NEWS)