Panaghiusa awhag ni Vidal sa tanan

CEBU, Philippines - Ang pagpalig-on sa kahiusahan sa katawhan maoy panawagan sa Arsobispo sa Sugbu nga si Ricardo Cardinal Vidal atol sa labing una niyang pagselebrar sa Misa De Gallo diha sa Saint Francis of Assisi Parish Church sa barangay Maslog sa dakbayan sa Danao kagahapon.

Kini ang gipadayag sa kardinal sa iyang homiliya, matud pa niya nga ang pagpangandam sa pagsaulog sa Pasko dili lamang sa pagpahimutang og mga paskohanong dayandayan kondili labing gikinahanglan usab nga mabatonan ang kalinaw.

Dugang pa niya nga ang kalinaw maangkon lamang kun adunay kahiusahan ug pagsinabtanay sanglit pinaagi lamang niini maangkon usab ang mga gipangindahay nga mga panalangin gikan sa Labaw nga Makagagahom.

Ang pagselebrar ni Vidal sa maong Misa de Gallo gihangop sa mga molupyo sa barangay Maslog ug kasikbit nga barangay kini tungod kay posibleng mao na kini ang katapusang higayon nga makaselebrar og Santos nga Misa sa ilang lugar ang Arsobispo.

Si Vidal gikatakdang moretiro na sa pagka-arsobispo sa Artsidiyosisi sa Simbahan sa Sugbu karong bulan sa Enero ug hulipan na kini ni Arsobispo Jose Palma sa Palo,Leyte.

Si barangay kapitan Josephine Quiros sa nahisgutang barangay ug mga barangay opisyales maoy nangulo sa unang gabii sa Misa de Gallo sa ilang lugar.

Samtang walay natalang kagubot o kasamok sa Metro Cebu ug sa lalawigan sa Sugbu atol sa maong relihiyosong kalihukan sumala pa sa kapolisan. (BANAT NEWS)