Dasmagan sa trak sa Capitol angol

CEBU, Philippines - Angol ang usa ka bayongbayong human kini dasmagi sa usa ka dump truck sa kagamhanan sa lalawigan didto sa barangay Malingin sa lungsod sa Bogo niadtong Martes sa hapon.

Ang biktima nga nakaangkon og samad ug mga pangos sa kalawasan ug ulo mao si Jimmy Lipascua, 17, nga taga Malingin, samtang ang nakadasmag mao ang mini dumptruck nga gipanag-iya sa probinsiya nga gimaneho ni Allan Rom, 56, minyo, nga taga Maslog siyudad sa Danao.

Si SPO2 Rogel Layson, traffic investigator sa Bogo Police Station mibutyag sa Banat News nga ang mini dump truck gikan pang nagdeliber og mga school supply didto sa barangay Tambogon, sa lungsod sa San Remegio.

Dihang paingon na kining mopauli dinhi sa dakbayan sa Sugbo pag-abot sa maong lugar nasundan niini ang biktima nga nagsakay sa iyang besiklita.

Apan tungod kay dunay gikusgon ang pagpadagan sa maong dumptruck na-apikihan kini sa pagpreno hinungdan nga nasaghiran gyud ang biktima ug maayong pagkahulog gikan sa gisakyan niining bisiklita ug nabundak sa sementadong karsada.

Busa samdan sa ulo ug uban pang bahin sa lawas   ang biktima ug gihatod dayon ngadto sa Verallo District Hospital sa Bogo apan gi-transfer usab dayon sa tambalanan sa dakbayan sa Sugbo .

Samtang ang drayber nga kawani sa Kapitolyo bulontaryo usab nga mitahan sa iyang kaugalingon ug kasamtangang gitanggong sa prisohan sa kapolisan. – BANAT NEWS