CEBU, Philippines - Gihimakak ni Mayor Michael Rama ang mitumaw nga report nga matud pa aduna siya’y gikasab-an nga konsehal gumikan sa panginlabot niini sa operasyon sa Cebu City Medical Center.
Matud pa niya dili niya estelo ang mangasaba sa iyang mga tawo gumikan kay nag-agi na usab siya pagka-konsehal sulod sa 18 ka tuig.
Dugang pa niya nga adunay mga panahon nga modako ang iyang tingog apan wala kini magpasabot nga nangasaba siya.
Sa laing bahin, gipadayag sa mayor dili hustong desisyon ang gipadayag ni kanhi konsehal Joy Pesquera nga andam kini mobiya sa siyudad sa Sugbo basta mohunong na si Kongresista Tomas Osmeña sa pagpunay og saway niini ngadto kang Rama.
Matud pa sa mayor nga siya maoy anaa sa eksena sa panagsungi busa dili angayan nga madamay ang ubang tawo.
Kahinumdoman nga mitingog na si Pesquera human ipadayag ni Osmeña nga nanginlabot siya sa mga kalihokan sa City Hall.
Sumala pa ni Pesquera nga dili siya manginlabot sa kalihokan sa City Hall ilabi na sa desisyon nga himoon sa mayor.
Hinuon alang kang Rama, nga manghinaot lang siya nga masulbad ra ang maong kasungian sa dili madugay nga walay maangin sa maong isyu.
Dugang pa niya nga katungod ni Osmeña nga mosaway sa iyang administrasyon apan dili kini makaapekto sa iyang trabaho sa pag-alagad sa mga tawo. – BANAT NEWS