Ulo sa ugangan giabis sa umagad

CEBU, Philippines - Napahak ang bagolbagol sa usa ka ugangan human kini abisa sa sanggot sa iyang umagad didto sa sitio Bantayan, barangay Poblacion, dakbayan sa Lapulapu sa miaging gabii.

Ang biktima mao si Joseph Borres, hingkod , samtang ang suspetsado mao usab si Mark Padin, hingkod, nga umagad ra sa biktima nga molupyo sa maong lugar.

Si PO2 Calixto Botantan sa kapolisan sa Lapulapu mibutyag nga nag-away ang suspetsado ug ang asawa niini sa sulod sa ilang balay, apan wala na makaagwantang maminaw ang biktima sa mainitong tinubagay sa magtiayon, miapil na sa lalis nga midapig sa iyang anak nga asawa sa suspetsado.

Ang pagsalmot sa biktima sa away sa magtiayon, maoy nakapikal pag-ayo sa suspetsado hinungdan nga kalit kining milanit sa iyang sanggot ug liog unta sa iyang ugangan maoy puntariya niyang akgotan.

Apan abtik nga nakahupo ang biktima hinungdan nga nadapyas ra ang hait kaayong sanggot sa ulo niini ug maayong pagkapahak .

Dihang nakita sa suspetsado nga misirit ang daghang dugo sa ulo sa iyang ugangan, misirit dayon kini pahilayo sa maong lugar hinungdan nga wala siya hidakpi sa kapolisan.

Samtang ang biktima gihatod usab dayon ngadto sa Vicente Sotto Memorial Medical Center sa dakbayan sa Sugbo. – BANAT NEWS