CEBU, Philippines - Naapektohan na ang kita sa mga mamaligyaay sa kamerkadohan gumikan sa nagkamahal na karon sa presyo sa mga basic goods.
Kini maoy gibutyag sa vice chairman sa Cebu Market Vendors Development Cooperative nga si Clarisa Otadoy kinsa mipadayag nga nagkamingaw na karon ang merkado partikular na sa mga prutasan.
Nagkanayon si Otadoy nga praktikal na karon ang mga tawo ug unahon niini ang pagpalit ang nag-una nilang panginahanglanon. Dugang pa niya nga nagkamahal usab karon ang presyo sa manga gumikan kay dili kaayo kusog ang supply niini karong panahona.
Ang mangga nga gibaligya sa Sugbo naggikan kasagaran sa Negros, Davao ug sa barangay Busay ug Guadalupe ning dakbayan. Gitataw hinuon niya nga nagpabilin gihapon ang presyo sa apple ug sa orange gumikan kay nagsobra ang supply niini sa kamerkadohan.
Sa laing bahin, padayon nga giawhag ni Otadoy ang publiko nga padayon nga mangumpra sa Carbon Market gumikan sa ilang kasaulogan nga “Pasko sa Carbon 2010” nga gidumala sa kagamhanan sa dakbayan sa Sugbo.
Nasayran usab nga duna gihapoy ipahigayong Misa de Gallo sa maong merkado sugod karong Disyembre 16 ug usa sa regular nga motambong niini mao si Mayor Michael Rama. – BANAT NEWS