Saavedra gikasab-an
CEBU, Philippines - Gikasab-an ni Regional Trial Court Judge Raphael Yrastorza ang whistleblower nga si Crisologo Saavedra gumikan sa pag-apil-apil niini sa kaso sa Balili.
Atol sa husay kagahapon, apil sa mibarog sa sala si Saavedra aron ipahibawo sa huwes nga may gisang-at siya nga manifestation may kalabutan sa maong kaso.
Apan gipakgang siya ni Yrastorza sanglit wala siyay labot sa kaso ingon nga dili siya kadugo sa mga Balili nga may interes sa gibayad sa Kapitolyo balor og P99 milyones sa pagpalit sa luna sa Tinaan, Naga.
Wala’y nahimo si Saavedra gawas sa pagbiya sa sala ni Yrastroza.
Nunot niini, labihang katawaha ni Gob. Gwendolyn Garcia sa gidangatan ni Saavedra.
Si Saavedra misang-at og kasong libelo batok kang Garcia human siya nganli nga daw sa irong buang nga pataka lang og paghot.
“He got what he deserves,” sumala pa ni manlalaban Rory Jon Sepulveda, ang tigpamaba sa gobernador.
Ang husay kagahapon nagtumong unta sa bawion nga P37 milyones sa Kapitolyo nga gibayad sa bahin sa luna nga giingong ilawom sa dagat.
Wala mahinayun ang husay sa kaso human wala makapresentar si Provincial legal officer Marino Martinquilla sa mga affidavit sa iyang mga testigos. – BANAT NEWS
- Latest
- Trending
