Molupyo sa Alegria midangop sa pag-ampo vs tipos

CEBU, Philippines - Sa padayong pagsaka sa kaso sa tipos sa duha ka mga barangay sa lungsod sa Alegria ang mga residente sa lugar midangop na ang mga molupyo sa pag-ampo.

Ang mga residente nagpahigayon og prosisyon ug pagrosaryo diha sa ilang lugar diin ilang gipangayo nga mokunhod na ang kaso sa tipos ug mopalayo kini sa ilang dapit.

Niining ulahi lang usa ka 17-anyos nga batang lalaki ang namatay sa miaging adlaw sumala pa sa report sa ABS-CBN Central Visayas. Apan dili makatuo ang pamilya sa maong menor nga tipos ang namatyan niini. Ang maong biktima nadala na sa Vicente Sotto Memorial Medical Center tungod nagkalibang na kini og dugo ug diha na usab kini makabsi sa iyang kinabuhi.

Base gihapon sa maong report nga miabot na ngadto sa 600 nga kaso sa tipos ang natala diha sa barangay Sta.Filomena ug Poblacion ug mipadala na og hinabang sa Department of Health sa maong lugar.

Ang Department of Health wala pa molibkas nga typhoid outbreak free ang nahisgutang duha ka barangay tungod kay walay nakitang kausaban sa ilang mga mainom nga tubig bisan paman sa gibutang nga chlorine.

Si Christine Giango ang provincial health officer sa unang pakighinabi sa Banat News mibutyag nga ang kagaw nga nagdala sa sakit nga typhoid fever mao ang salmonella typhi. Matud pa niini nga makuha ang maong kagaw gikan sa hugaw nga tubig ug hugaw nga pagkaon. – BANAT NEWS