Rama nanghinaot nga dili maparehas ni Alvin Garcia

CEBU, Philippines - Nanghinaut si Mayor Michael Rama nga dili unta siya mahisusama sa sitwasyon ni kanhi Mayor Alvin Garcia ug Kongresista Tomas Osmeña nga nag-atbang sa piniliay niadtong 2001.

Kini maoy gipadayag sa mayor isip reaksyon sa padayon nga panagsungi nila ni Osmeña human ang naulagi misaway kaniya gumikan sa pipila ka pamaagi kaniya sa pagdumala sa City Hall. Kahinumduman nga misaway si Osmeña ngadto kang Rama gumikan sa presensya matud pa nila ni Joy Pesquera ug Rene Mercado sa mga kalihukan sa City Hall.

Matud pa ni Rama nga dili siya makatugot nga maguba ang imahe sa iyang pagkatawo ingon man usab ang iyang pagdumala sa kagamhanan sa dakbayan sa Sugbo.

Giklaro sa mayor nga dunay mga panahon nga mangayo siya og sugyot gikan sa nagkadaiyang mga sektor sa angayang desisyon nga pagahimuon gumikan kay iyang gipatigbabaw sa iyang administrasyon ang pagtinabangay.

Luyo sa pagsaway ni Osmeña sa administrasyon ni Rama, gipasalig sa mayor nga dili siya magpaapekto niini ug magpadayon ang iyang paghatag nga patas nga serbisyo ngadto sa iyang mga konsituwente.

Apan ang kapitan sa barangay Cogon-Pardo nga si Eugenio Gabuya nga nasakop sa oposisyon nakapanglantaw nga mag-uli ra sa dili madugay ang maayong kabubot-on nila ni Osmeña ug Rama.  – BANAT NEWS