Nasakmit nga pabuto gibuboan og tubig sa PNP

CEBU, Philippines - Mga illegal nga pabuto nga nasakmit sa kapolisan sa lungsod sa Cordova gibasa og tubig sa kapolisan atol sa simpleng seremonyas nga gitambungan sa lokal nga mga opisyal kagahapon sa buntag.

Si Cordova Vice Mayor Rodrigo Jumao-as ug mga konsehales sa lungsod sa Cordova maoy nangunay ug misaksi sa pagbubo og tubig ngadto sa mga pabuto nga nasakmit sa ilang kapolisan sa milabay’ng adlaw.

Matud pa ni Jumao-as kini usa ka mensahe ngadto sa publiko nga ang Cordova hugot nga miimplementar sa pagdili ug pagpamaligya og pabuto ilabi na kung anaa kini sulod sa mga lugar o dapit nga daghang tao.

Si Sr. Insp. Felix Pacaldo ang hepe sa Cordova Police Station miingon nga seryoso sila sa pag-regulate sa pagpamaligya og pabuto ug kinahanglang magsubay sila sa patakaran.

Kahinumduman nga 13 ka mga sinakong pabuto nga tag-as og kalidad ang nasakmit sa mga sakop sa Marine Watch sa lungsod sa Cordova uban ni PO2 Samson Igot nga dad-on unta sa Bohol. (BANAT NEWS)