Mayor Loot mokiha ni Digal

CEBU, Philippines - Nagtinguha si Daanbantayan Mayor Maria Luisa Loot nga mopasaka og kiha batok sa hepe sa kapolisan sa lalawigan sa Sugbo, Sr. Supt.Erson Digal tungod sa pagpabalhin sa unom ka mga polis ngadto sa ubang dapit.

Hinuon paaboton pa ni Loot ang kamandoan ni Digal sa pagpabalhin sa unom ka polis sa lungsod sa Daanbantayan.

“Siya naman hinuon ang magbuot without informing me as the local chief executive of Daanbantayan,” matud pa ni Loot. Apan si Digal nagkanayon nga igo lang siya nagtuman sa kamandoan ni Police Regional Office 7 Director Ager Ontog Jr. sa pagpabalhin sa ubang sakop ngadto sa buhatan nga kuwang og mga tawo. Polisiya sa PRO7 nga matag police station kinahanglang adunay dili mominus 21 ka sakop.

“I was directed by R1 (personnel division sa PRO7) to explain why some police stations wala kaabot og 21 ang personnel unya ang uban nanobra,” matud pang Digal. Ang Daanbantayan Police Station adunay 27 ka mga polis hinungdan nga gitinguha nga ang ubang sakop niini ibalhin sa silingang mga lungsod sa Medellin ug San Remegio. (BANAT)