13-anyos gilugos sa iyang ama-ama

CEBU, Philippines - Naghilak nga misumbong sa iyang inahan ang usa ka 13-anyos nga batang babaye nga biktima sa pagpanglugos sa iyang ama-ama sa sulod sa ilang panimalay sa usa sa mga barangay sa dakbayan sa Lapulapu ala-una pasado ang takna sa miaging kaadlawon.

Ang suspetsado 42-anyos (pangalan gipugngan) nga molupyo sa maong dapit, kapuyo sa inahan sa biktima kasamtangan karong gibalhog sa detention cell human madakpi sa follow-up operation nga gihimo kagahapon. Ang mga sakop sa kapolisan sa Presinto 4 ug Women’s Section sa Lapulapu Police Office (LLPO) pinangulohan ni PO2 Lordiana Sayson maoy nakadakop sa suspek.

Si PO3 Martin Fortuna sa kapolisan sa maong dakbayan nga nahinabi sa Banat News miingon nga gitanggong ang supetsado ug gikatakdang pasakaan og kasong pagpanglugos base usab sa mga ebidensiya nga giandam sa kapolisan. Sa imbestigasyon ni PO2 Sayson wala diha ug nagtrabaho ang inahan sa biktima dihang nahitabo ang pagpanglugos.

Subay sa gitug-an sa biktima ngadto sa iyang inahan maoy nasayran nga nahinanok kini sa pagkatulog sa sulod sa ilang panimalay ug nahigmata na lamang kini dihang gipasulod sa suspetsado ang tudlo niini ngadto sa iyang kinatawo.

Buot unta kining mobangon ug mangayog panabang sa ilang mga silingan apan gipugngan kini sa suspetsado ug gitiunan og kutsilyo dayon mibahad nga patyon kun magdumili kini sa iyang gusto nga buhaton.

Dugang pang asoy sa biktima nga gawas sa pagpasulod sa tudlo sa suspetsado ngadto sa iyang kinatawo gipanghikap pa gyod ang tibuok niyang lawas ug hangtod nga napahimuslan ang iyang pagkababaye. (BANAT)