CEBU, Philippines - Usa ka tawo nga nag-atubang og kaso sa illegal nga drugas ang nakaipsot sa kapolisan human kini mihulgang pabuthan og duha ka granada ang mga polis nga paulbohon alas-3 pasado ang takna sa milabay’ng hapon sa sitio Pag-utlan sa barangay Umapad sa dakbayan sa Mandaue.
Apan si Insp. Wilson Abot, hepe sa Presinto 5 sa Opao Police Station nga nahinabi sa DyKC wala hinuon mokumpirmar nga nagdala og duha ka granada si Alex Omolon.
Matud pa ni Abot nga wala sila personal nga nakakitang nagbitbit og granada si Omolon gawas lang sa pahimangno kanila sa mga sakop sa pamilya sa suspek nga aduna kini armas.
Sumala pang Abot sa unang higayon nilang pagdakop unta kang Omolon sa miaging bulan nakalighot kini pinaagi sa pagsuot sa daghang tawo. Si Omolon adunay warrant of arrest maong kini gipangita sa balaod. - BANAT NEWS