Taga Naga nalipay sa taga Kapitolyo

CEBU, Philippines - Gihangop sa katawhan sa barangay Tinaan, lungsod sa Naga ang pag-ugmad sa kontrobersiyal nga luna sa mga Balili nga gibayran og P99 milyones sa Kapitolyo.

Walay bisan usa nga mipadayag og pagsupak sa gihimong public hearing kagahapon sa nahisgutang lugar nga gitambungan sa mga opisyal sa lungsod sa pagpanguna ni Mayor Valdemar Chiong, kapitan Zosimo Panilag ug gatosan ka mga residenti.

Natubag sa kadagkoan sa Kapitolyo nga gipangulohan ni manlalaban Jose Ma. Gastardo ang pangutana sa katawhan ug nalamdagan sila sa nahaunang mga kabalaka sama sa posibleng kadaut sa panglawas.

Matud pa ni Gastardo nga luwas ang panglawas sa katawhan sa maong proyekto ug ang matukod nga mga pabrika sa maong luna, hatagan og prayoridad ang taga barangay nga makatrabaho.

Butang nga gikalipay kaayo sa katawhan sanglit mao kini ang ilang gipangandoy.

Nunot niini, si Panilag miingon nga mohatag siya og endorsement aron mapadayon na sa Kapitolyo ang proyekto human sa maong public hearing. “Gov. Gwen ipadayon ang imong proyekto dinhi sa Tinaan,” usa sa mga placard nagkanayun. - BANAT NEWS